Prosedimentu

Bo no ta di akuerdo ku bo doño di kas òf hürdó tokante e preis di hür òf e mantenshon di bo kas? E ora ei posiblemente bo por embolbí e Komishon di hür pa duna un veredikto tokante bo problema.

Di kua kasnan ta trata?

E Komishon di hür ta trata disputa tokante akuerdo di hür i hürmentu di un kas ku ta trata un uso di un karakter di término largu.

Ki ora sí bo por akudí na e Komishon di hür?

Hürdó i doño di kas posiblemente por kuminsá un proseso serka e Komishon di hür den e siguiente situashonnan. Ta konsehabel si pa promé trata di sali afó konhuntamente,  promé ku bo entrega un petishon.

Entregá un petishon

Si bo no ta di akuerdo ku bo hürdó òf doño di kas tokante preis di hür, mantenshon, kosto di servisio, e ora ei bo por posiblemente kuminsá un proseso serka e Komishon di hür. Bo ta hasi esaki dor di entrega di un petishon.

Karta di petishon

Bo ta kuminsá un proseso dor di entregá un formulario (karta di petishon) serka e Komishon di hür. Pa kada proseso tin un karta di petishon apart. Tambe tin karta di petishon apart pa hürdó i pa doño di kas. Tin biaha bo mester agregá dokumento huntu ku e karta di petishon. Si esei ta e kaso, esei ta pará riba e karta di petishon.

Paga tinu: mester manda mayoria karta di petishon promé ku un sierto fecha òf dentro di un sierto periodo. Esaki ta pará riba e karta di petishon. Si bo ta muchu lat òf muchu tempran, e Komishon di hür no por trata bo petishon e ora ei.

Konfirmashon di risibimentu

Si e Komishon di hür a risibí i buk bo karta di petishon, bo ta haña un konfirmashon di risibimentu via karta. Den e konfirmashon di risibimentu ta pará entre otro e number di e kaso i e datonan di kontakto di e Komishon di hür. Si ta falta dokumento ainda, e ora ei esei tambe ta pará den e karta. Bo mester manda esaki nan mas lihé posibel e ora ei. Esei por via karta. E Komishon di hür ta manda un konfirmashon di risibimentu tambe pa e kontra partido, ku un kopia di bo karta di petishon.

Kiko ta pasa ku e petishon?

Ora tur e dokumentonan ta kompleto, e Komishon di hür ta tuma bo petishon mas aleu den tratamentu. Bo ta risibí informashon tokante e proseso via karta. E tratamentu di e kaso ta dura un kantidat di siman. Bo por lesa mas informashon bou di Transkurso di un proseso.

Kambionan durante e proseso

Ta importante ku e Komishon di hür tin e datonan korekto di nòmber i direkshon di e hürdó i di e doño di kas. Manda pa e motibu ei kambionan manera mudansa òf kambio semper mas lihé posibel via karta na e Komishon di hür.

Kolekshon di informashon

Dependiente di e tipo di petishon ku a entregá, e Komishon di hür ta kolektá informashon. Esaki por sosodé dor di un investigashon den e kas òf dor di wak si e doño di kas a kobra e sumanan korekto di kosto (di servisio).

Investigashon den un kas

Si un investigashon den un kas tuma lugá, tur dos partido ta risibí un karta dos siman delantá. Den e karta aki ta pará e fecha i e momento riba kua e investigadó di e Komishon di hür ta bini.

Seshon

Ta invitá hürdó i doño di kas tur dos pa un seshon di e Komishon di hür. Durante e seshon nan por reakshoná riba e rapòrt. Bo por haña mas informashon riba e página tokante e seshon.

Veredikto

Despues di e seshon e Komishon di hür ta tuma un desishon riba e kaso. Esaki ta sosodé sin doño di kas òf hürdó. E Komishon di hür ta manda e veredikto via pòst pa ámbos partido, normalmente dentro di tres siman despues di e investigashon preparatorio.

No di akuerdo ku e veredikto

E veredikto di e Komishon di hür ta obligatorio. Bo no ta di akuerdo ku e veredikto di e Komishon di hür? E ora ei bo por kuminsá un proseso serka e Korte den Promé Instansia di Boneiru, Sint Eustatius i Saba. Bo mester hasi esaki dentro di seis siman despues ku e Komishon di hür a manda e veredikto.

Veredikto di presidente

Tin biaha e Komishon di hür no ta hasi investigashon òf tene seshon. E presidente di e Komishon di hür ta duna un veredikto e ora ei. Bo ta risibí e veredikto via pòst. Si bo no ta di akuerdo ku e veredikto di e presidente di e Komishon di hür, e ora ei bo por presentá opheshon dentro di seis siman (registrá oposishon). E Komishon di hür ta studia bo opheshon i por disidí e ora ei pa tuma e kaso di nobo den tratamentu.

• manda tur informashon ku e Komishon di hür tin mester di dje lo mas lihé posibel, pa asina e fail ta kompleto. Den e karta di petishon ta pará di kua informashon ta trata;
• ta presente durante e investigashon den e kas;
• ta presente durante e seshon;
• manda kambionan den dato di kontakto (adrès/number di telefòn) na tempu